Kvinnedagen i Iran: Gravid kristen kvinne fekk 16 års fengsel

Tre kristne konvertittar er dømde til over 40 år i fengsel til saman for skuldingar knytte til trua deira og aktivitet i huskyrkjer.

Dommane fall på 8. mars, den internasjonale kvinnedagen. Dommaren var den berykta Imam Ashari i Revolusjonsdomstolen. Ei gravid kvinne fekk den lengste straffa, skriv Article 18, ein organisajson som Stefanusalliansen støttar.

Lengste straffa for kvinne
Narges Nasri (37) er omlag halvveges i svangerskapet med det første barnet sitt. Ho fekk tre dommar på til saman 16 års fengsel.

– Dette er den lengste fengselsstraffa idømt noko kristen kvinne i Iran, fortel direktør Mansour Borji i organisasjonen Article 18 til Stefanusalliansen.

Narges fekk 10 år i fengsel for «propagandaverksemd i strid med islamsk lov» og fem år for medlemskap i ei «opposisjonsgruppe» (huskyrkje).

På toppen av dette fekk ho eitt år for «propaganda mot staten». Det var straffa for at ho på sosiale medium hadde støtta «Kvinner, liv og fridom-rørsla». Det er protestrørsla som vaks fram etter at den kurdiske kvinna Mahsa Amini under uklare omstende døydde i hendene på det iranske moralpolitiet i september 2022 etter å ha «brukt hijaben feil».

Dette er den lengste fengselsstraffa idømt noko kristen kvinne i Iran

Mansour Borji

Mista også sosiale rettar
Abbas Soori (48 år) fekk totalt 15 år i fengsel: Han blei dømt til 10 år i fengsel for «propagandaverksemd» og fem år for medlemskap i ei «opposisjonsgruppe» (huskyrkje).

Mehran Shamloui (37) fekk åtte år for «propagandaverksemd» og to år og åtte månader i fengsel for medlemskap i «ei opposisjonsgruppe». Sum: Nær 11 år bak murane.

Alle tre mista også alle sosiale rettar, som helsehjelp, arbeid og utdanning. Narges og Abbas. Mehran mista rettane desse rettane i 15 år, Mehran i 11 år. Dei tre fekk også store bøter.

Narges og Abbas fekk dessutan forbod mot å vera medlem i noko som helst gruppe etter at dei ein dag slepp ut av fengsel. Dei har dessutan fått forbod mot å bu i heimeprovinsen Teheran og forbod mot å dra frå Iran i to år etter ei framtidig lauslating.

Også medlemmer blir dømde
Tidlegare var det leiarar av huskyrkjer som fekk fengselsdommar, ikkje medlemmer.

– Men det gamle skiljet mellom leiarar og medlemmar stemmer ikkje lenger. Det viser faktum. Også medlemmer av huskyrkjer risikerer fengselsstraff, seier Mansour Borji.

Johannes Morken i Stefanusalliansen seier:
– Denne saka er nok eit rystande døme på den brutale forfølginga som ayatolla-regimet driv mot kristne konvertittar, berre på grunn av deira tru og deira kristne fellesskap. Her blir altså ei gravid kvinne dømd til 16 års fengsel. Tidlegare har regimet til dømes dømd ein trafikk-skadd 60-åring til seks års fengsel for deltaking i ei husmenighet. Det er absurd at desse to kvinnene og andre dømde utgjer ein trussel mot Irans nasjonale tryggleik, seier redaktør Johannes Morken i Stefanusalliansen.

Han peikar også på at ein del av domsgrunnlaget for dei sist dømde, er medlemskap i ei husmenighet. Tidlegare var leiarar av huskyrkjer og nettverk av husmenigheter dei som risikerte forfølging og fengsel.

– Men i aukande grad blir også konvertittar dømde for medlemskap. Vår partnar Article 18, som dokumenterer situasjonen for trusfridomen i Iran, slår fast at den gamle distinksjonen mellom leiarar og medlemmar kva gjeld risiko for forfølging, ikkje lenger stemmer. Men dessverre held Landinfo, som gir fakta om situasjonen i Iran til behandlinga av norske asylsaker, framleis på dette skiljet. Det er det ikkje grunnlag for. Det er eit faktum at også medlemskap i ei huskyrkje kan føra til tiltale og dom, seier Morken.

Bibel og korssmykke konfiskerte
Dei tre kristne blei arresterte hausten 2024. Etterretningsagentar raida heimane deira i Teheran i samtidige aksjonar. Biblar, kors, musikkinstrument og andre eigendelar blei konfiskerte. Mehran er musikar. Utstyret agentane konfiskerte, var verdt rundt 5 500 dollar, tilsvarande knapt 60 000 kroner.

Dei tre blei etter arrestasjonane overførte til avdeling 209 i det berykta Evin-fengselet i Teheran, som er under kontroll av Etterretningsdepartementet. Dei blei lauslatne mot kausjon ein månad seinare, etter lange og intensive avhøyr.

Ikkje berre leiarar, men også medlemmer av huskyrkjer risikerer fengselsstraff

Mansour Borji

 

Minst ti andre arresterte
Rettssaka fann stad den 15. februar i avdeling 26 i Revolusjonsdomstolen i Teheran. Dei blei tiltalte  for «medlemskap i opposisjonsgrupper«, «propaganda mot systemet» og »propagandaverksemd i strid med islamsk lov gjennom utanlandske relasjonar».

Minst 10 andre kristne blei arresterte den same haustdagen i koordinerte raid mot kristne heimar over heile Iran, inkludert i byane Karaj (nær Teheran), Mashhad i nordaust, og Shiraz og Bandar Abbas i sør.

Abbas vart arrestert også i 2020. I ei rettssak vart han dømt saman med ein annan kristen konvertitt, Maryam Mohammadi, og pastoren deira, ein iransk-armenar, Anooshavan Avedian.

Abbas og Maryam fekk den gongen reiseforbod, eksil frå heimeprovinsen Teheran og forbod mot medlemskap i politiske eller sosiale grupper. Anooshavan, som er i 60-åra, fekk 10 år i fengsel. Han blei frikjent i september i fjor, etter å ha sona litt over eitt år av straffa si.

Trappar opp lange straffer
Regimet i Iran trappar opp bruken av lange fengselsstraffer. I 2024 blei 96 kristne dømde til 263 år i fengsel til saman. Mange av desse blei arresterte i arrestasjonsbølgjer i andre halvdel av 2023.

No kjem altså dommane for kristne som blei arresterte i ulike raid i 2024.

Samstundes er regimet godt i gang med nye arrestasjonar av kristne konvertittar i 2025.
Den 6. februar raida offiserar frå Den islamske revolusjonsgarden ei hagesamling for kring 60 kristne nord i Iran.  Også der konfiskerte dei biblar og musikkinstrument. Kors-smykke vart rivne av halsen på folk. Den kristne konvertitten Somayeh Rajabi blei arrestert, anklaga for å arrangere «hemmelege, konspirative samlingar» og for «propaganda mot regimet». Den 8. mars blei ho sett fri mot kausjon på 40 000 dollar.

Sveltestreik
Den same dagen, 6. februar, blei Nasser Navard Tapeh og Joseph Shahbazian arresterte på nytt, etter tidlegare å ha blitt benåda frå lange fengselsdommar.  Nasser har i meir enn ein månad vore i sveltestreik i protest mot arrestasjonen.

– Vi er svært urolege for helsetilstanden til Nasser, seier Mansour Borji. Også Joseph sit framleis i varetekt i Evin-fengselet. Ingen av dei har fått vita kva dei er skulda for, og ingen har fått advokat.

Vi er svært urolege for helsetilstanden til Nasser

Mansour Borji

Kalla inn til nye avhøyr
Article 18, som har gode kjelder i Iran, skriv at fleire dusin kristne som først blei arresterte saman med Joseph sommaren 2020, i vinter er innkalla til nye avhøyr, eller dei har hatt besøk av offiserar frå etterretningsdepartementet. Dette skjer i eit forsøk på å  finna prov for at pastor Joseph framleis er involvert i huskyrkjer. Dette var skuldinga som førte til at han vart arrestert i 2020, seinare dømt til ti års fengsel og så «benåda».

Då han blei «benåda», hadde ein ankedomstol alt redusert straffa sidan det ikkje fanst nok prov for å dømma han til maks-straffa etter paragraf 498 i den islamske straffelova. Paragrafen omhandlar organisering av grupper som «trugar nasjonal tryggleik».